Владејачката коалиција Вреди бара истрага за кредит од пет милиони евра што белградската „Алта банка“, според нејзините тврдења, го одобрила на компанија поврзана со семејното опкружување на лидерот на ДУИ, Али Ахмети. Коалицијата прашува под какви услови бил одобрен кредитот и дали постои политичка поврзаност со влезот на банката на македонскиот пазар.
Според Вреди, кредитот бил одобрен на 9 јуни 2025 година на компанија во која косопственик е кичевската „АС Сењак“, за која коалицијата наведува дека е во сопственост на Селаудин Арифи, сват на Ахмети. Во соопштението на кое се повикуваат медиумите не е наведено името на компанијата што, според ова тврдење, го добила кредитот.
Обвинувањата доаѓаат откако на „Алта банка“ во Белград ѝ беше одземена дозволата за работа, а нејзиниот сопственик Давор Мацура беше приведен во Србија.
Вреди бара да се проверат трансакциите
Од коалицијата наведуваат дека кредитот бил одобрен во период кога српската банка се подготвувала да влезе на македонскиот банкарски пазар преку купување акции во тогашна Стопанска банка Битола.
Тие прашуваат зошто белградската банка одобрила кредит на фирма што ја поврзуваат со семејството на Ахмети и дали зад трансакцијата имало политички договор. Од Вреди ова го оценуваат како можна политичко-финансиска корупција и бараат надлежните институции да ги проверат наводите.
Коалицијата ги повика Јавното обвинителство и Управата за финансиско разузнавање да ги испитаат условите под кои, според нивното тврдење, бил одобрен кредитот, какво обезбедување било дадено и каде завршиле средствата.
„На 9 јуни 2025 година, токму во екот на подготовките за влез на српската ‘Алта банка’ во Македонија, компанија во која косопственик е токму ‘АС Сењак’ на сватот на Ахмети, добива кредит од пет милиони евра“, наведуваат од Вреди.
Самото одобрување кредит не докажува незаконитост или политичка корупција. За таквите обвинувања би биле потребни документација и постапка пред надлежните институции. Во достапните извештаи што ги проверивме не најдовме независна потврда за условите на конкретниот кредит или доказ дека Ахмети лично бил негов корисник.
Што се случува со „Алта банка“?
Народната банка на Србија на 31 октомври ѝ ја одзеде дозволата за работа на „Алта банка“ во Белград, а потоа беше отворена стечајна постапка. На сопственикот Давор Мацура во Србија му беше одреден притвор поради сомневања за злоупотреба на положбата. Станува збор за постапка во која се изнесени сомневања, а не за правосилна пресуда.
По случувањата во Србија, македонската Народна банка воведе привремена администрација во „Алта банка“ АД Битола, која е посебно правно лице во земјава. Од Народната банка појаснија дека администрацијата не значи затворање на битолската банка, туку привремена мерка со која управувањето го преземаат лица именувани од регулаторот.
Од Вреди најавија дека на следна прес-конференција ќе објават дополнителни информации за, како што велат, настани што следувале по наводната кредитна трансакција.
