Во скопската населба Пржино започна снимањето на долгометражниот игран филм „Пролетно чистење“, дебитантско остварување на режисерката Марија Апчевска-Петровска, која го потпишува и сценариото заедно со Ереник Беќири.
Филмот ја следи приказната за Варава, ќерка која по самоубиството на својата мајка се враќа во родниот град, каде се соочува со минатото и со мистериозни случувања кои сугерираат дека нејзината мајка се вратила од задгробниот живот.
Во главните улоги настапуваат Јулиа Марковска-Фалзон и Зоја Николова, за кои ова е прво филмско искуство, а дел од актерската екипа се и Стефан Вујисиќ, Ана Костовска и Ника Розман.
Директор на фотографија е Константинос Кукулис од Грција, додека во авторската екипа се вклучени и филмски професионалци од Србија, Словенија и Македонија. За монтажата е задолжен Драган Вон Петровиќ, костимограф е Лидија Андриќ, а шминката и маската ги работи Мојца Горогранц Петрушевска. Македонскиот дел од екипата го сочинуваат и Кирил Спасески како дизајнер на продукција и Игор Поповски како тон-мајстор.
Филмот е во продукција на „Кино Око“ на Роберт Насков, а финансиски е поддржан од Агенцијата за филм на Македонија, како и од филмските центри на Словенија, Грција и Србија. Проектот добил поддршка и од европскиот фонд EURIMAGES и програмата МЕДИА.
