Регулаторната комисија за енергетика, водни услуги и услуги за управување со комунален отпад (РКЕ) донесе нова одлука со која од полноќ значително се зголемуваат цените на нафтените деривати во земјава.
Според новата одлука, малопродажните цени во просек ќе бидат повисоки за 5,88 проценти во однос на претходната пресметка.
Најголем раст има кај дизел горивото, кое поскапува за шест денари по литар. Од 21 јули, ЕУРОДИЗЕЛ БС (Д-Е V) ќе се продава по максимална цена од 94 денари за литар.
Бензините исто така поскапуваат. ЕУРОСУПЕР БС-95 се зголемува за три денари и ќе чини 90 денари за литар, додека ЕУРОСУПЕР БС-98 ќе достигне цена од 92 денари за литар.
Повисока цена ќе има и екстра лесното масло за домаќинство (ЕЛ-1), кое поскапува за седум денари и ќе се продава по 93 денари за литар. Мазутот М-1 НС поскапува за 3,205 денари и новата цена ќе изнесува 45,373 денари за килограм.
Од РКЕ образложуваат дека зголемувањето е резултат на растот на референтните цени на нафтените деривати на светските пазари. Во споредба со претходната пресметка, бензините бележат раст од 9,003 проценти, дизелот од 14,963 проценти, екстра лесното масло за домаќинство од 13,200 проценти, а мазутот од 10,686 проценти.
При пресметката е земена предвид и одлуката на Владата за намалување на акцизите – за еден денар по литар кај бензините и за два денари по литар кај дизелот.
Новите максимални малопродажни цени ќе важат од 21 јули 2026 година во 00:01 часот. РКЕ напоменува дека станува збор за највисоки дозволени цени, а трговците имаат можност горивата да ги продаваат и по пониски цени.
