Рано утринава околу 4 часот, во улицата Драган Ракиќ во белградската населба Земун, избувнал пожар во кој целосно изгореле шест патнички возила, а оштетен е и дел од фасадата на станбена зграда во непосредна близина.
Според неофицијални информации, огнот избувнал истовремено на повеќе автомобили паркирани на различни места долж истата улица, што дополнително ги зајакнува сомнежите дека пожарот можеби бил намерно подметнат.
Очевидци пријавиле дека во текот на инцидентот биле слушнати детонации, што предизвикало вознемиреност кај жителите од околните згради. Пожарот брзо се проширил и зафатил дел од фасадата на објектот до кој биле паркирани возилата.
На местото интервенирале противпожарни екипи кои успеале да го локализираат и изгаснат огнот, спречувајќи поголема материјална штета. Нема повредени лица, потврдија надлежните служби.
Полицијата изврши увид на терен и започна истрага за да се утврдат точните причини за пожарот, како и дали станува збор за кривично дело – намерно предизвикување пожар. Засега нема официјални информации за евентуални осомничени.
Истрагата е во тек.
