Во последните 24 часа на подрачјето на Штип се регистрирани две измами врз повозрасни лица, при што сторителите се претставувале како лекари и известувале за наводни сообраќајни несреќи со повредени членови на семејството.
Првиот случај бил пријавен вчера во 11:30 часот од 96-годишен маж, кој навел дека бил измамен за 3.500 евра. Лицето телефонски се претставило како лекар и тврдело дека неговата ќерка има скршеници и е потребна итна операција. По претходен договор, парите биле фрлени од балконот и преземени од лице што чекало под објектот, по што исчезнало. По контакт со ќерката, мажот сфатил дека станува збор за измама.
Вториот случај бил пријавен во 16:30 часот од 77-годишна жена, која исто така била измамена на сличен начин. Лицето кое се претставило како лекар и рекло дека нејзината ќерка е тешко повредена, добило 3.000 евра, 30.000 денари и златен накит, кои жената ги предала од балконот. По преземањето, сторителот го напуштил местото.
Министерството за внатрешни работи соопштува дека се преземаат мерки за целосно расчистување на случаите и откривање на сторителите.
