Група млади лица два дена по ред вандализирале училишен двор во скопската општина Аеродром, предизвикувајќи материјална штета и неред во просторот наменет за учениците и граѓаните.
Според информациите што ги објави градоначалникот на Општина Аеродром, Дејан Митевски, инцидентите се случувале околу 22:30 часот, кога лицата со мотори превртувале контејнери, оштетувале урбана опрема и зад себе оставале уништен јавен простор.
„За жал, вакво неодговорно однесување е забележано и на повеќе локации низ општината – со уништување на урбана опрема, детски игралишта и други јавни содржини. Затоа, во соработка со МВР, ги засилуваме контролите и надзорот на критичните локации. Таквото однесување нема да биде толерирано“, порача Митевски.
Тој информираше дека сторителите се веќе идентификувани и дека против нив е поднесена соодветна пријава.
Од Општината најавуваат засилени контроли и поголем надзор на јавните површини со цел да се спречат нови случаи на вандализам и уништување на јавниот имот.
