Дваесетгодишната В.З. од Градско е осудена на пет години затвор за тешка сообраќајна несреќа со смртни последици што се случи пред 15 месеци во близина на Кавадарци. Судењето било спроведено во отсуство, а Основниот суд Кавадарци ја прогласил за виновна за кривичното дело „Тешки дела против безбедноста на луѓето и имотот во сообраќајот“.
Покрај затворската казна, на обвинетата ѝ е изречена и забрана за управување моторно возило од „Б“ категорија во траење од пет години.
Обвинетата, која во моментот на несреќата имала 18 години, по настанот ја напуштила државата и била лоцирана во Германија, каде што е уапсена. Во моментов се наоѓа во имиграционен притвор, а веќе е започната постапка за нејзина екстрадиција во земјава.
Од судот информираат дека пресудата сè уште не е правосилна, бидејќи одбраната поднела жалба.
Според утврдените факти, обвинетата управувала со возилото со голема брзина и преминала на спротивната коловозна лента, но не била под дејство на алкохол или други опојни средства.
Сообраќајната несреќа се случила на 5 ноември 2024 година на регионалниот пат Кавадарци–Росоман, во близина на селото Рибарци. Во судирот меѓу возило „сеат“, управувано од обвинетата, и „опел“, животот го загубил 40-годишен сопатник од Велес, додека две лица се здобиле со тешки телесни повреди.
