
Продолжува потрагата по лицето кое исчезна во реката Вардар кај Гостивар. По барање на Министерството за внатрешни работи, Дирекцијата за заштита и спасување повторно ги ангажираше специјализираните тимови за пребарување.
Во акцијата учествува Тимот за брз одговор за спасување на води, со логистичка поддршка од Подрачното одделение на ДЗС во Гостивар. На терен е и заменик-директорот на Дирекцијата, Кашмир Салиу.
Екипите го пребаруваат течението на Вардар, почнувајќи од критичните точки во градот и продолжувајќи кон низводните подрачја. Потрагата се спроведува во координација со полицијата и локалните служби.
Од ДЗС апелираат граѓаните што имаат информации за исчезнатото лице или ќе забележат нешто покрај коритото на реката, веднаш да пријават во полиција или на бројот 112.























