Празничен ден кој требало да помине во духот на семејна релаксација и детска радост, за само неколку минути се претворил во сцена на страв и неизвесност во автобус на линија од Водно кон центарот на Скопје. Скопјанката Наташа Младеновска сподели вознемирувачко сведоштво за инцидент во кој главни актери биле малолетници, а ситуацијата кулминирала со вадење ножеви.
Според нејзините зборови, конфликтот започнал како недоразбирање меѓу тинејџери на возраст од околу 16 години, кое брзо прераснало во вербални провокации и закани. Клучниот момент, како што раскажува, бил кога дел од нив извадиле ножеви, со што ситуацијата станала сериозно опасна.
„Добив повик од ќерка ми. Паника, плачење, глас кој се тресе“, вели Младеновска, која веднаш се упатила со автомобил кон местото за да интервенира.
Во обид да спречи ескалација, таа ги пронашла младите и директно им се обратила. Според нејзиниот опис, станувало збор за четири лица – две девојчиња и нивните партнери, кои биле видно вознемирени и под дејство на алкохол.
„Четворица. Две девојчиња и нивните дечковци. Бесни, под дејство на алкохол, со ножеви во рака тргнаа кон мене“, сведочи таа.
Со присебност и смирен пристап, Младеновска успеала да ја деескалира ситуацијата и да спречи физички судир, иако, како што вели, била подготвена и за најлошото сценарио.
„Го оттурнав хаосот со зборови, а одвнатре – вулкани“, додава таа.
Инцидентот завршил без физички повреди, но остава сериозна загриженост за безбедноста, особено кога станува збор за малолетници.
„Не можам да се смирам од мислата што можеше да се случи. Денес децата носат ножеви како да е тоа нормално“, предупредува Младеновска.
