Во голема полициска акција на Министерството за внатрешни работи, во координавија со Основното јавно обвинителство Скопје, вчера во Горно Количани беше запленет кокаин со висока чистота, скриен во БМВ X5 со скопски регистарски ознаки. Вкупното количество на дрогата изнесува 10 килограми, што ја прави една од поголемите заплени во последниот период.
Автомобилот бил запрен од полицијата, по што јавниот обвинител обезбедил наредба за детален претрес. Истражителите откриле дека дрогата била внимателно скриена во импровизиран бункер во подвозјето на возилото.
Против 26-годишниот возач на БМВ-то е покрената истражна постапка за кривично дело – неовластено производство и пуштање во промет на наркотични дроги, психотропни супстанции и прекурсори, според член 215 став 1 од Кривичниот законик. Обвинителството ќе предложи мерка притвор за осомничениот, поради опасност од бегство, можност за влијание врз сведоци и соучесници, како и ризик од повторување на кривичното дело.
