Претседателот на Србија, Александар Вучиќ, денес јасно порача дека одлуката за евентуална кандидатура за премиер на идните парламентарни избори ќе биде негова лична одлука, која не треба да се шпекулира од страна на функционерите на Српската напредна партија (СНС).
„Не е време ниту место да се зборува за тоа. Ги замолувам Ана (Брнабиќ), Милош (Вучевиќ) и Синиша (Мали) да не шпекулираат. Прво мојата одлука, потоа одлуката на народот“, истакна Вучиќ, нагласувајќи дека иако не ја исклучува можноста за кандидатура, не сака да ја преземе без енергија и ентузијазам.
Вучиќ ја искористи можноста да зборува и за предизвиците пред Србија. „По 14 години владеење е тешко да се избегне потребата за промени. Постигнавме многу, но луѓето често ги земаат резултатите здраво за готово. Сега е време да се менуваме себеси, да го трансформираме системот, образованието и да ги разбереме современите технологии, вклучително и вештачката интелигенција“, рече Вучиќ.
Повод за денешното обраќање беше и церемонијата во Претседателството на Србија, каде епископот Бихаќко-петровачки Сергије му го врачи Орденот на новомачениците за „покажано милосрдие и голема љубов“ кон епархијата и манастирот Рмањ.
