Студентите од иницијативата „Блокада“ најавија нови протести вечерва низ Србија под слоганот „Вечерас пуцате по шавовима“. Протестите ќе се одржат во повеќе од 30 градови, а во Белград ќе бидат локациите пред Генералштабот, на кружниот тек кај Општина Нови Белград и на Автокоманда. Во Нови Сад собирот започнува во 19:45 часот пред зградата на БИА.
Протестите следат по инцидентите од претходните денови, кога приврзаници на Српската напредна странка употребиле пиротехника за да гаѓаат граѓани во Врбас, а слични судири се случиле и во Нови Сад, при што полицијата не интервенирала.
Организаторите апелираат на безбедност, советувајќи граѓаните да не доведуваат деца или домашни миленици, поради високата бучава, гужвата и непредвидливите ситуации кои можат да ја загрозат нивната безбедност.
Протестите се дел од серија активности на студентите за изразување незадоволство од насилството и за заштита на правото на слободно изразување во Србија.
