Турскиот нафтен танкер „Altura“ се најде на мета на напад во Црното Море, откако бил погоден од дрон на околу 24 километри од Босфор. На бродот, кој пренесувал огромен товар од 140.000 тони руска нафта, избила силна експлозија што предизвикала значителни оштетувања на палубата и во машинскиот простор, со продор на вода што дополнително го загрозил танкерот.
На лице место веднаш интервенирала турската крајбрежна стража, службите за безбедност на пловидбата и специјализираниот брод за итни случаи „Nene Hatun“. Овој брод, опремен за гаснење пожари, спасување на екипаж и справување со потенцијални излевања на нафта, покрај тоа обезбедува и итна медицинска помош, нуркачки операции до 100 метри длабочина, како и транспорт со хеликоптер.
