Унгарската нафтена компанија МОЛ наскоро официјално ќе ја преземе Нафтената индустрија на Србија (НИС), најдоцна до средината на март, изјави денеска првиот потпретседател на Владата и министер за финансии, Синиша Мали. Според него, договорот е практично финализиран, а официјалното потпишување се очекува пред рокот што го одреди американската Канцеларија за контрола на странски средства (OFAC), односно до 24 март.
„Со унгарската страна и со партнерите од Обединетите Арапски Емирати веќе ги усогласивме правата и обврските. Очекувам договорот да биде потпишан и пред крајниот рок – најверојатно до средината на март“, изјави Мали.
Министерот оцени дека најголемиот дел од работата е завршен, бидејќи term sheet документот, кој ги содржи клучните точки на договорот, е усогласен меѓу МОЛ и рускиот Газпром. „Ова е добра вест за граѓаните и економијата. Намалувањето на неизвесноста околу снабдувањето со гориво и иднината на НИС создава стабилна основа за идни инвестиции, технолошки развој и нови работни места“, додаде тој.
Американската OFAC на 31 декември 2025 година ѝ издаде специјална лиценца на НИС, овозможувајќи продолжување на работењето до 23 јануари и поставувајќи краен рок за финализирање на продажбата до 24 март 2026 година. Претседателот Александар Вучиќ претходно изјави дека очекува лиценцата да биде продолжена и не гледа причина процесот да биде блокиран.
Србија успеа да го зголеми својот удел во НИС за пет проценти, што се смета за значаен дипломатски и економски успех.
