Германски државјанин е уапсен во Истра откако бил затекнат како тајно снима голи деца на плажа со својот мобилен телефон, соопшти хрватската полиција.
Инцидентот се случил на 4 септември околу 13 часот во близина на туристички објект, кога вработен во компанија за обезбедување го забележал осомничениот и веднаш го задржал до пристигнувањето на полицијата.
По наредба на судија, полициските служби извршиле претрес на автомобилот, просториите и техничката опрема на мажот, при што пронашле инкриминирачки материјали. Веќе следниот ден, на 5 септември, осомничениот бил однесен во притвор со поднесена кривична пријава.
Полицијата нагласи дека јавноста станува сè посензибилизирана за проблемот со снимањето деца и дека граѓаните сè почесто пријавуваат сомнителни ситуации, што овозможува навремени реакции и апсења.
Воедно, упатен е апел до родителите да обрнат поголемо внимание на своите деца, особено на плажите, и да се осигураат дека носат костими за капење. Доколку забележат лице кое снима деца, веднаш да се јават на бројот 192.
