Новинарка беше приведена за време на посетата на бугарскиот премиер Румен Радев на Струмјани, што предизвика остри реакции во јавноста и на социјалните мрежи.
Станува збор за Гергана Петрова, која редовно известува за состојбата во регионот, особено за последиците од поројните дождови, материјалната штета и проблемите со инфраструктурата и водоснабдувањето.
Видео од нејзиното приведување беше објавено од локалната веб-страница „Пиринско“ и брзо се прошири на социјалните мрежи.
На снимката се гледаат тројца полицајци кои се обидуваат да ја внесат Петрова во службено возило. Таа притоа повторува дека не направила ништо незаконско.
„Не сум направила ништо лошо, не сум го прекршила законот. Ова е моето село“, се слуша како вели новинарката.
Во продолжение таа им се спротивставува на полицајците и вели дека сака да си оди дома кај своето дете. Во исто време, присутни граѓани реагираат и прашуваат зошто ја приведуваат.
Петрова во изминатиот период известувала за последиците од временските непогоди во Струмјани, објавувајќи фотографии и информации за оштетувањата на локалната инфраструктура и водоводната мрежа.
Таа е позната и по своето учество во граѓански иницијативи поврзани со проблемите со водоснабдувањето, меѓу кои и протестите под слоганот „Вода за народот“.
Нејзиното приведување за време на посетата на Радев предизвика дополнително внимание, особено поради фактот што станува збор за новинарка која известува за локалните проблеми и критички ги следи реакциите на институциите.
Снимката од настанот отвори низа прашања за постапувањето на полицијата и за слободата на новинарите да известуваат од јавни настани.
