Бугарските власти започнаа процес на собирање податоци за бројот и состојбата на засолништата од бомби низ земјата, во услови на зголемени безбедносни тензии во регионот. Според информации објавени во српските медиуми, регионалниот управител на Варна побарал детална проверка на капацитетите и техничката состојба на засолништата на територијата на регионот, со цел да се утврди нивната подготвеност во случај на евентуална вонредна состојба.
Во извештаите се наведува дека низ Бугарија постојат повеќе објекти кои историски биле изградени за заштита на населението, но останува прашањето во каква состојба се тие денес. Како пример се посочува подземен бункер во софискиот округ Лозенец, кој, според наводите, последен пат бил користен за време на Втората светска војна и со години е запуштен.
Објектот, според описите, има долг систем на коридори со ознаки кон различни простории, како и остатоци од канализациски и вентилациски инсталации. Во него има повеќе простории што наликуваат на менза, санитарии и работни простории, додека најголем дел од просторот го заземаат долгите ходници.
Градоначалникот на округот, Константин Павлов, изјавил дека не е целосно јасно во каква функционална состојба се ваквите објекти, иако проценува дека би можеле да примат неколку стотици луѓе. Сепак, според него, пред евентуална употреба би требало да се решат прашањата поврзани со вентилацијата и осветлувањето. Во исто време, се разгледува и можност бункерот во иднина да биде пренаменет во културен простор.
Како најголемо потенцијално засолниште во земјата се посочува метрото во Софија, кое располага со повеќе од 50 километри тунели. Според директорот на Метрополитен, во случај на вонредна состојба, покрај пероните, би се користеле и тунелите, а вкупниот капацитет би зависел од конкретните потреби на населението.
Слични примери има и во други делови од земјата. Во Благоевград, на пример, еден бункер се наоѓа под станбена зграда и бил изграден во 1960-тите години. Жители од зградата тврдат дека со години никој не влегол во објектот и дека тој останал заклучен, иако во минатото бил делумно адаптиран и опремен.
Според податоците што се цитираат во медиумите, во Бугарија постојат 247 засолништа кои можат да се користат. Од нив, 18 се оценети како технички целосно подготвени за итна употреба, додека 229 се во задоволителна состојба и би можеле да се стават во функција во рок од една недела.
Во меѓувреме, во регионот се преземаат и дополнителни мерки за зајакнување на противвоздушната и противракетната одбрана. Грчкиот министер за одбрана Никос Дендијас соопшти дека една батерија од системот Patriot е преместена на северот на Грција, со цел да се зајакне одбраната што опфаќа и дел од бугарската територија.
