Украинскиот претседател Володимир Зеленски изјави дека е подготвен да се сретне со американскиот претседател Доналд Трамп, но само во формат кој би вклучувал и директни разговори со рускиот лидер Владимир Путин.
Во интервју за „Скај њуз“, Зеленски нагласи дека нема предуслови за средба со Путин, со цел да се најде решение за прекин на вооружениот конфликт. Според него, трилатерален состанок со посредство на Трамп би можел да отвори пат за сериозен компромис.
Тој, сепак, беше јасен дека ваков самит не може да се одржи во Москва. Дополнително, Зеленски повторно го повика Трамп да заземе јасен став за санкциите против Русија и за потребата од меѓународни безбедносни гаранции за Украина.
„Само со конкретни гаранции можеме да ставиме крај на војната и да ја заштитиме независноста и територијалниот интегритет на нашата држава,“ истакна украинскиот лидер, додавајќи дека присуството на Трамп на преговорите би им дало дополнителна тежина.
