Зеленски: Во близина на Вовчанск се борат платеници од Азија и Африка
Украинскиот претседател Володимир Зеленски изјави дека руските сили кои дејствуваат во близина на градот Вовчанск, во Харковскиот регион, се засилени со странски платеници од Кина, Таџикистан, Узбекистан, Пакистан и неколку африкански држави.
За време на посетата на 57-та одделна моторизирана пешадиска бригада, која го брани секторот Вовчанск, Зеленски се сретна со командантите за да разговара за состојбата на фронтот, тековните борбени операции и зголемената потреба од пешадија, пренесува Индекс.
Градот Вовчанск, лоциран на само пет километри од руската граница, е епицентар на интензивни судири откако Русија во мај 2024 година започна нова копнена офанзива во Харковскиот регион.
„Војниците на овој фронт забележуваат присуство на платеници од Кина, Таџикистан, Узбекистан, Пакистан и некои африкански земји. Ние ќе одговориме“, истакна украинскиот претседател.
Зеленски додаде дека на терен разговарал и за прашањата поврзани со регрутацијата и зголемување на пристапот до беспилотни летала, кои се клучни во сегашните одбранбени и извидувачки операции на Украина.
Уште во април, Зеленски изјави дека „неколку стотици“ кинески државјани активно учествуваат на руската страна во конфликтот, но Пекинг ги негираше тие наводи, повикувајќи ги своите граѓани да се воздржат од каква било вклученост во воени дејства.
Во истиот контекст, Киев обвини дека Русија ангажира и околу 12.000 војници од Северна Кореја, распоредени во Курскиот регион, како дел од пошироките напори на Москва да ги засили своите трупи со странски сили.
