Украинскиот претседател Володимир Зеленски изјави дека се плаши од можноста САД да го изгубат интересот за посредување во мировниот процес меѓу Киев и Москва, пренесе Sky News. На прес-конференција во Даблин со ирскиот премиер Мајкл Мартин, тој рече дека останува умерен оптимист, но призна дека загриженоста е реална.
„Имаше малку оптимизам поради брзината на преговорите и јасниот интерес од американската страна. Тоа покажа дека Америка не се повлекува од дипломатскиот дијалог, и тоа е добро“, изјави Зеленски.
На прашањето дали се плаши дека САД би можеле да се дистанцираат од процесот, тој одговори: „Да, се плашам. Ако некој од нашите сојузници се замори…“ Зеленски додаде дека Русија има интерес „да го одвлече вниманието на Америка“ од украинското прашање.
Украинскиот лидер рече дека очекува повратни информации од американските посредници Стив Виткоф и Џаред Кушнер, кои неодамна се сретнаа со рускиот претседател Владимир Путин во Москва. Тој изјави дека е подготвен повторно да се сретне со американскиот претседател Доналд Трамп, но потенцира дека таква средба ќе зависи од исходот на разговорите во Кремљ.
Виткоф, како што беше најавено, му презентирал на Путин ажуриран план за прекин на конфликтот, составен од 28 точки и дополнет со предлози од европските лидери. Претходната верзија на планот беше остро критикувана поради, како што беше оценето, провиски ставови и попуштање пред Кремљ.
Украина категорично одбива да разгледува било какво отстапување територии и инсистира дека секој договор мора да го зачува нејзиниот суверенитет и долгорочната безбедност. Киев и европските влади бараат силни безбедносни гаранции слични на Член 5 на НАТО – мерка што би барала целосна поддршка од Вашингтон, кој сè уште не се изјаснил дали е подготвен да оди до таа точка.
Москва, пак, тврди дека таквите гаранции се непотребни. Путин пред средбата со американските претставници порача дека Русија е подготвена да се брани ако Европа започне војна.
„Ако Европа реши да војува со нас, подготвени сме веднаш. Тоа не е под знак прашање“, изјави рускиот лидер.
Путин ги обвини европските влади дека со неприфатливи барања се обидуваат да го прикажат Кремљ како пречка за мировниот процес и да ги поткопаат напорите на САД за постигнување договор.
Со сите овие спротивставени позиции, останува неизвесно дали дипломатските напори ќе продолжат со ист интензитет – и дали Вашингтон ќе ја задржи клучната улога во процесот.
