Лов на убиецот на Чарли Кирк: 100.000 долари награда за информации
Американските власти повеќе од едно деноноќие трагаат по напаѓачот кој го усмрти конзервативниот активист Чарли Кирк и потоа исчезна во шумската област.
Безбедносните камери снимиле лице кое се симнува од покрив и трча по улица, а федералните истражители објавија фотографии од осомничениот, надевајќи се на помош од јавноста. За информации што ќе доведат до негово апсење е распишана награда од 100.000 долари.
„Сакаме да бидеме сигурни дека видеото и фотографиите ќе добијат што е можно поголемо внимание, за да ја добиеме неопходната помош од јавноста во фаќањето на ова зло суштество“, изјави гувернерот на Јута, Спенсер Кокс.
Истражителите веќе пронашле траги – отпечатоци од дланка и обувки, како и моќна ловна пушка во близина на патеката по која побегнал осомничениот.
