[ВИДЕО] Голем пожар во Дубаи: Итно евакуирани речиси 4.000 станари од облакодер

Во елитната населба Дубаи Марина синоќа избувна голем пожар во облакодер со 67 ката, по што итно беа евакуирани речиси 4.000 лица.

Како што пренесуваат локалните медиуми, пожарот избувнал доцна во петокот вечерта, а траел околу шест часа. Екипите на Граѓанска одбрана на Дубаи успеале да го стават под контрола и целосно да го изгаснат во денес во раните утрински часови.

Според официјалните информации објавени од Канцеларијата за медиуми на Дубаи (Dubai Media Office), брзата интервенција на противпожарните и спасувачките служби спречила човечки жртви. Успешно се евакуирани вкупно 3.820 лица од 764 станови, а нема пријавени повредени.

Очевидци велат дека пожарот постепено почнал да стивнува околу 1:30 по полноќ.

„Гореше околу два часа. Имаше многу пепел и отпад што паѓаше од зградата. Се чинеше дека службите ја држеа ситуацијата под контрола“, изјави еден од жителите од соседна зграда за локален медиум.

Причините за пожарот засега не се официјално соопштени, а властите отворија истрага.