Џеј Ди Венс изјави во четвртокот дека тестирањето е неопходно за правилно функционирање на американскиот нуклеарен арсенал, еден ден откако претседателот Доналд Трамп објави дека САД ќе продолжат со тестирањата.
„Имаме значаен арсенал, тоа е јасно. Русите имаат значаен нуклеарен арсенал. Кинезите имаат значаен нуклеарен арсенал. Понекогаш мора да го тестирате за да бидете сигурни дека е оперативен и дека функционира правилно“, изјави Венс пред новинарите во Белата куќа.
„Да бидам јасен – знаеме дека функционира како што треба, но потребно е да се следи неговата состојба со текот на времето“, додаде тој.
Еден ден претходно, Доналд Трамп на својата платформа Truth Social објави дека, „поради програмите за тестирање кои ги спроведуваат други земји“, побарал од Пентагон „да започне со тестирање на нашето нуклеарно оружје на рамноправна основа“.
Неговите изјави се однесуваат на Кина и Русија и дојдоа по серија најави од Владимир Путин за развој на ново руско оружје со нуклеарни способности.
Сепак, Трамп не прецизираше каков вид тестирање бара, што предизвика загриженост во меѓународната јавност. Потпретседателот исто така не даде дополнителни објаснувања за видот на тестовите.
„Мислам дека објавата на претседателот на Truth Social зборува самата за себе“, изјави Венс.
