Велика Британија денес ги повика сојузниците на Украина да започнат „50-дневна кампања“ за зголемување на воената помош за Киев, со цел да се засили притисокот врз Русија за преговарање за прекин на огнот пред истекот на ултиматумот што минатата недела го постави американскиот претседател Доналд Трамп.
Трамп ѝ даде рок од 50 дена на Москва да ја заврши војната во Украина, заканувајќи се со нов бран санкции и најавувајќи масовно вооружување на Украина преку НАТО.
На виртуелниот состанок на Контакт групата за одбрана на Украина, британскиот министер за одбрана Џон Хили изјави дека ултиматумот претставува „максимална можност“ за западните сојузници да извршат одлучен притисок врз Кремљ.
„Мораме да ја интензивираме нашата акција со 50-дневна кампања за вооружување на Украина на бојното поле и да придонесеме за принудување на Путин на преговарачка маса“, рече Хили.
Контакт групата, предводена од Велика Британија и Германија, обединува околу 50 земји кои ѝ обезбедуваат воена помош на Украина.
Хили најави дека Лондон и Берлин заеднички ќе испратат ракети за воздушна одбрана, додека германскиот министер за одбрана Борис Писториус објави набавка на 200.000 гранати за украинските „Гепард“ тенкови.
Британското Министерство за одбрана информираше дека во последните два месеци испратило воена помош во вредност од 173,2 милиони евра, додека дополнителни 808,2 милиони евра ќе бидат искористени за купување муниција и беспилотни летала до крајот на годината.
Коалицијата предводена од Велика Британија и Латвија досега ѝ испорача на Украина речиси 50.000 дронови, а уште 20.000 се очекува да пристигнат во наредните недели.
