Портпаролката на УНИЦЕФ, Тес Инграм, изјави денеска дека повеќе од еден милион деца во Појасот Газа и понатаму се без пристап до вода и храна, а илјадници од нив секоја ноќ легнуваат гладни, иако е постигнат договор за прекин на огнот.
Инграм објасни дека околу 650.000 деца треба да се вратат во училиштата и истакна дека прекинот на огнот е „добра вест“, бидејќи значи крај на секојдневното бомбардирање кое убиваше деца — но не е доволен за да се стави крај на гладот или да се обезбеди безбеден пристап до вода за пиење, пренесува палестинската агенција WAFA.
„Семејствата во Газа сè уште секојдневно се борат за опстанок. Инфраструктурата што обезбедуваше вода и здравствена грижа за децата е сериозно оштетена, што го прави пристапот до овие основни потреби речиси невозможен,“ изјави Инграм.
Според неа, количината на хуманитарна помош што пристигнува во Појасот Газа по почетокот на примирјето е малку зголемена во првите две недели, но и натаму е „тажно недоволна“.
„Помошта што пристигнува во Газа и понатаму е далеку помала од количините што влегуваа во окупираната палестинска енклава пред почетокот на војната,“ додаде портпаролката на УНИЦЕФ, Тес Инграм.
