Украина и Норвешка ќе започнат заедничко производство на украински дронови, по потпишувањето на договор меѓу украинскиот премиер Денис Шмигал и норвешкиот министер за одбрана Торе Сандвик.
Шмигал соопшти дека соработката претставува важен чекор за проширување на производствените капацитети и зајакнување на одбранбените способности на Украина. Веќе наредната година е планирано лансирање на пилот-производствена линија, со визија за понатамошно проширување.
„Украина ќе го сподели своето искуство и иновации со Норвешка, а за возврат ќе добиеме силна производствена линија што ќе ги снабдува нашите војници со модерни дронови, како и заедничка работа во истражувањето и дизајнот со водечки норвешки институции“, порача Шмигал, изразувајќи благодарност за континуираната норвешка поддршка.
