Американскиот претседател Доналд Трамп повторно ја заостри реториката за територијално проширување на САД, објавувајќи манипулирани фотографии на социјалните мрежи со кои алудира на американска контрола врз Канада и Гренланд.
На една од објавите, Трамп е прикажан во Овалната соба со европски лидери, покрај мапа на Западната хемисфера на која САД, Канада, Гренланд и Венецуела се обоени во црвено-бело-сини бои. Фотографијата е обработена верзија на снимка од август, направена за време на средба со европски претставници за војната во Украина, меѓу кои Урсула фон дер Лајен, Кир Стармер и Џорџа Мелони.
Претседателот повторно ја изнесе и контроверзната идеја Канада да биде ставена под американска контрола, па дури и да стане „51-та сојузна држава“, што и претходно предизвика остри реакции во Отава.
Во друга објава, Трамп е прикажан како поставува американско знаме на Гренланд, заедно со потпретседателот Џеј Ди Венс и државниот секретар Марко Рубио. На фотографијата стои натписот: „Гренланд – територија на САД, основана 2026“. Во серијата објави на „Трут соушал“, Трамп повтори дека преземањето на Гренланд е „императив“ за глобалната безбедност, додавајќи дека „нема враќање назад“.
Тој својата визија за зголемена американска контрола врз Западната хемисфера ја нарекува „Доктрина Донро“, алузија на Доктрината Монро и на неговото презиме.
