Американскиот претседател Доналд Трамп упати остра порака до демонстрантите во Иран, охрабрувајќи ги да продолжат со протестите и да ги „преземат своите институции“. Во објава на социјалните мрежи, Трамп порача дека одговорните за насилството врз граѓаните „ќе платат висока цена“ и најави дека ги откажал сите контакти со иранските претставници додека не престане, како што наведе, суровото постапување кон демонстрантите.
Истовремено, двајца неименувани извори од Министерството за одбрана на САД изјавија дека Трамп е запознаен со поширок спектар на воени и тајни опции во однос на Иран, вклучително и мерки што одат подалеку од класични воздушни напади. Според CBS News, тимот за национална безбедност денеска ќе одржи состанок во Белата куќа за да ги разгледа најновите сценарија, иако не е познато дали претседателот лично ќе присуствува.
Во меѓувреме, повеќе медиуми и извори блиски до случувањата објавија дека бројот на загинати во иранските протести достигнал околу 2.000 лица. Организациите за човекови права предупредуваат и на серија масовни апсења, при што еден 26-годишен демонстрант, Ерфан Солтани, наводно се соочува со смртна казна по забрзана судска постапка поврзана со протестите во градот Карај, во близина на Техеран.
