Цените на нафтата драстично паднаа поради ескалацијата на трговските тензии меѓу САД и Кина.
Американскиот претседател Доналд Трамп најави дека САД ќе воведат дополнителни 100% царини на увозот од Кина, обвинувајќи ја земјата за „необично агресивен став“ во трговијата. На својата платформа Truth Social, Трамп изјави дека Пекинг испратил „екстремно непријателско писмо до светот“ и вовел „строги контроли на извозот за речиси сè што произведува“.
Трамп посочи дека дополнителните царини ќе почнат да се применуваат од 1 ноември 2025 година, при што САД ќе воведат и контрола на извозот за клучен софтвер во Кина. „Заради овој невиден став на Кина, САД ќе воведат дополнителна царина од 100%, покрај веќе постоечките“, напиша претседателот. Тој додаде дека сега „нема причина за состанок со кинескиот лидер Си Џинпинг“ за време на неговото претстојно патување во Јужна Кореја.
Пазарите реагираа веднаш – цените на нафтата на меѓународните пазари паднаа под 63 долари за барел. На лондонскиот пазар, цената на барелот падна за 2,49 долари на 62,73 долари, а на американскиот пазар се тргуваше за 58,91 долари.
Пекинг претходно воведе контроли на извозот на технологии за преработка на ретки земјени минерали, со што се ограничува снабдувањето за цивилни и воени цели. Ескалацијата на трговските тензии меѓу САД и Кина може да го забави светското стопанство и побарувачката за енергенси.
Трамп ја повика Кина на внимателност, истакнувајќи дека САД ќе се спротивстават финансиски: „За секој елемент кој тие успеале да го монополизираат, ние имаме два“. Тој потврди дека планираниот состанок со Си на АПЕК во Јужна Кореја е откажан.
Бела куќа и кинеското амбасадорство во Вашингтон засега не дале коментар.
