Силна експлозија утринава одекна во воена фабрика за производство на експлозив Accurate Energetic Systems, LLC, сместена на границата помеѓу округот Хикман и округот Хамфрис во Тенеси, околу еден час југозападно од Нашвил. Неколку лица загинаа, а најмалку 19 се исчезнати, соопштија локалните власти.
Експлозијата се случи околу 7:45 часот по локално време и предизвика низа помали детонации. Шерифот на округот Хамфрис, Крис Дејвис, ја опиша како „разурнувачка“. Итните служби брзо го обезбедија подрачјето и работат на проценка на штетата и гасење на пожарот. Поради опасност од нови експлозии, спасувачите се држат на безбедна далечина од епицентарот.
Жителите во близина на фабриката изјавија дека почувствувале силен удар. „Мислев дека куќата ми се урнала додека бев внатре“, изјави Џентри Стовер за Associated Press.
Фабриката произведува високоексплозивни материјали и специјални производи за Министерството за одбрана на САД. Властите не открија колку работници биле присутни во моментот на несреќата ниту бројот на лица хоспитализирани.
На местото на настанот се присутни и федерални агенции, вклучувајќи ATF и FBI, а канцеларијата на шерифот ги повика граѓаните да го избегнуваат подрачјето за да спасувачките екипи можат непречено да работат.
