Администрацијата на американскиот претседател Доналд Трамп разгледува план според кој сите Палестинци би биле раселени од Појасот Газа, а САД би презеле контрола над територијата, пренесува „Вашингтон пост“.
Според извештајот до кој весникот имал пристап, околу два милиони Палестинци би биле пренасочени преку „доброволни премини“ во други земји или во оградени безбедносни зони во рамки на Газа за време на реконструкцијата. Територијата би ја управувала организација наречена „GREAT Trust“, а сопствениците на земјиштето би добиле „дигитални токени“ како надомест за правото на развој, кои би можеле да ги користат за нов почеток или за добивање стан во еден од шест до осум планирани „паметни градови“.
Предлогот го развиваат некои Израелци кои ја основале американско-израелската Хуманитарна фондација за Газа (GHF), која дистрибуира храна во регионот. Планот наишол на критики од голем број хуманитарни организации, вклучително и Обединетите нации. Канцеларијата за човекови права на ОН соопшти дека во близина на центрите на GHF повеќе од 1.000 Палестинци загинале додека чекале за храна.
