Јаир Нетанјаху, синот на израелскиот премиер Бенјамин Нетанјаху, предизвика бурни реакции на социјалните мрежи откако катарскиот емир Тамим бин Хамад ал-Тани и неговата мајка Моза бин Насер ги спореди со „современ Хитлер и Гебелс“.
„Катар е водечката сила зад бранот на антисемитизам што светот не го видел од 1930-тите и 1940-тите години. Тоа е модерна верзија на нацистичка Германија. Секој Евреин во светот е во опасност поради децениската кампања на оцрнување на еврејскиот народ и израелската држава, поддржана од милијарди долари што Катар ги инвестира“, напиша Јаир Нетанјаху на социјалната мрежа X.
Овие тешки зборови доаѓаат во период на нов застој во преговорите за ослободување на заложниците, каде што Катар има улога на посредник. Додека некои го обвинуваат Доха за поддршка на Хамас и за финансирање на Газа – средства што, според критичарите, индиректно ѝ овозможиле на милитантната група да гради арсенал против Израел – катарските власти тврдат дека токму Израел и САД ги повикале да испраќаат финансиска помош со цел да се избегне хуманитарен колапс во Газа.
Американскиот државен секретар Марко Рубио минатата недела ги отфрли критиките кон Катар, наведувајќи дека земјата играла „позитивна и конструктивна улога“ во тековните дипломатски напори.
Во меѓувреме, неколку блиски соработници на израелскиот премиер се наоѓаат под истрага, осомничени дека работеле во корист на држава од Персискиот Залив.
