Генералниот секретар на НАТО, Марк Руте, ја исмеа Русија поради лошата состојба на нејзината подморница „Новоросијск“, која, како што рече, „шлепајќи се враќа дома“ од патролата во Средоземното Море. Рускиот флот официјално соопшти дека подморницата изронела кај француската обала поради навигациски правила во Ла Манш, отфрлајќи наводи за сериозен дефект.
Сепак, холандските власти објавија дека подморницата била во процес на влечење во Северното Море. Во говор во Словенија, Руте изјави: „Сега, речиси и да нема руска поморска присутност во Средоземјето. Постои само една осамена и расипана руска подморница која шлепајќи се враќа дома.“
Тој ја спореди сцената со романот на Том Кленси „Потрага по Црвениот Октомври“ од 1984 година, додавајќи дека денес ситуацијата повеќе наликува на потрага по најблискиот механичар.
Според извори блиски до Москва, на подморницата на 27 септември се појавило истекување на гориво кое создадало ризик од експлозија. НАТО објави фотографии кои наводно ја прикажуваат француската фрегата како ја набљудува подморницата крај обалата на Бретан.
Подморницата „Новоросијск“ е дел од Црноморската флота од 2014 година, има посада од 52 члена и може да остане под вода до 45 дена. Сестринската подморница „Ростов на Дон“ беше потопена во украински напад минатото лето. Кралската морнарица на Велика Британија ја следи „Новоросијск“ од јануари, откако била забележана во Енглескиот канал.
