Администрацијата на претседателот на САД, Доналд Трамп, е подготвена да разгледа предлог кој би му овозможил на Иран да задржи ограничени „симболични“ капацитети за збогатување ураниум, со услов Техеран целосно да се откаже од можноста за развој на атомска бомба, изјавиле високи американски функционери за „Аксиос“.
Иако шансите за договор се мали, американските претставници нагласуваат дека евентуалниот компромис треба да исполни високи стандарди за да ги убеди скептиците во администрацијата на Трамп и на Блискиот Исток, особено во Израел. Претседателот Трамп, според функционерите, е подготвен да прифати суштински договор што може политички да го „продаде“ дома, но трпението на САД се намалува доколку Иран „игра игри“.
Во исто време, на Трамп му биле претставени и воени опции, вклучувајќи можност за директно таргетирање на врховниот лидер ајатолахот Али Хамнеи и неговиот син Моџтаба, како дел од сценарио за елиминација на водечките фигури на Иран.
САД, преку посредници како Стив Виткоф и Џаред Кушнер, побарале од Техеран детален предлог кој би ги решавал загриженостите на Вашингтон. Иранскиот министер за надворешни работи, Абас Арагчи, најави дека нацрт-предлогот ќе биде финализиран во следните два-три дена и дека ќе вклучува политички обврски и технички мерки, со можен надзор од Меѓународната агенција за атомска енергија, Рафаел Гроси.
