Администрацијата на американскиот претседател Доналд Трамп најавува значително проширување на визните ограничувања, како дел од новата стратегија за заштита на националните интереси на САД во Западната хемисфера. Според документот за национална безбедност што го објави Стејт департментот, Вашингтон ја заострува политиката кон лица и структури за кои се смета дека делуваат во корист на ривалски сили во регионот.
Во сржта на новите мерки стои намерата да се спречи влијанието на конкурентски држави врз клучни безбедносни, економски и политички процеси во американската „задна сфера“. Американската администрација нагласува дека ќе се настојува да се зачува водечката позиција на САД и непречен пристап до стратешки ресурси и комуникациски правци.
Новата политика им дава пошироки овластувања на американските власти да одбијат влезни визи за државјани од земјите на Западната хемисфера доколку постои сознание дека тие свесно дејствуваат во интерес на странски противници: било преку организации, компании или државни структури. Посебен фокус се става на лица кои директно или индиректно помагаат, финансираат или овозможуваат активности што се сметаат за штетни по американските интереси во регионот.
Под удар на мерките можат да се најдат и оние што учествуваат во трансфер на контрола врз стратешки ресурси, како и актери кои, според Вашингтон, придонесуваат кон дестабилизација на безбедносните напори или поткопување на демократските институции во земјите од регионот. Ограничувањата може да се прошират и врз членовите на потесните семејства на засегнатите лица.
Стејт департментот посочува дека дел од политиката веќе е ставена во примена, при што визи се ускратени за 26 лица за кои американските власти утврдиле дека се вклучени во активности спротивни на американските интереси.
