Полските борбени авиони во вторникот пресретнаа руски извидувачки авион кој летал во меѓународниот воздушен простор над Балтичкото Море, соопшти полската војска.
Леталото летало без поднесен план на лет и со исклучен транспондер, што предизвикало итна реакција на полските сили. Според војската, рускиот авион не го нарушил полскиот воздушен простор.
Земјите од источниот дел на НАТО сојузот веќе со месеци се во состојба на зголемена готовност поради честите инциденти со руски воени летала. Од септември се забележани повеќе случаи, меѓу кои и оној кога три руски авиони го повредиле естонскиот воздушен простор, само неколку дена по навлегувањето на десетици руски дронови во Полска.
Портпаролот на Оперативната команда на полската војска, Јацек Горишевски, изјави за ТВН24 дека инцидентот ја потврдува „подготвеноста на Полска да го заштити својот воздушен простор од секоја закана“.
Американскиот генерал Алексус Гринкевич, командант на сојузничките воздушни сили на НАТО во Европа, изјави за „Ројтерс“ дека Русија, по одлучниот одговор на НАТО на претходните инциденти, „привремено се повлекла од натамошни упади“, но дека и понатаму ќе се обидува да ги „тестира границите“.
