Медведев со закана: „Зона без летови над Украина би значела војна со НАТО“
Заменик-претседателот на рускиот Совет за безбедност, Дмитриј Медведев, предупреди дека воведување зона забранета за летови над Украина и евентуално соборување руски дронови од страна на НАТО би значело директен воен судир меѓу Алијансата и Русија.
„Спроведувањето на оваа провокативна идеја значи само едно – војна меѓу НАТО и Русија. Да ги наречеме работите со вистинско име“, напиша Медведев на Телеграм, реагирајќи на најавената операција „Источна стража“ за зајакнување на источните граници на Алијансата.
Тој остро го критикуваше и планот за користење на замрзнатата руска имовина како заем за Украина, нарекувајќи го „кражба“ и заканувајќи се дека Москва ќе ги „прогонува земјите и функционерите на ЕУ до крајот на времето, со сите можни средства“.
Во однос на изјавата на австриската министерка за надворешни работи, Беате Мајнл-Рајзингер, за можни мировни преговори, Медведев ја оцени како „контрадикторна“, потсетувајќи дека неодамна била за членство во НАТО.
