Швајцарија се подготвува за значајна промена во начинот на справување со семејното насилство, со планови за воведување систем на електронски надзор кој би овозможил следење на сторителите во реално време и поголема заштита на жртвите.
Идејата е во текот на втората половина од 2026 година, во кантонот Во, да започне пилот-фаза на проектот во која судски санкционирани лица ќе бидат под постојан електронски мониторинг. Во пракса, тоа значи дека секое нивно движење ќе се следи 24 часа дневно, особено во однос на забранетите зони, како домови на жртвите или други локации од кои им е изречно наложено да се држат на дистанца.
Според Василис Венизелос, претседател на локалното здружение за електронски надзор, новиот пристап би требало да овозможи создавање централизирана служба што постојано ќе ги проверува и ќе реагира на прекршувањата на заштитните мерки. Доколку лице под забрана влезе во ограничена област, системот автоматски ќе активира аларм, по што операторите ќе го контактираат и ќе му наложат итно повлекување. Во случај на непочитување, интервенцијата ќе ја преземе полицијата.
Покрај оваа фаза, се разгледува и понапреден концепт на таканаречен „динамичен надзор“. Тој би вклучувал и можност жртвите доброволно да носат уреди за геолокација, со цел постојано да се следи растојанието меѓу нив и сторителот. Сепак, властите нагласуваат дека ваквата мерка нема да биде обврзувачка и ќе зависи исклучиво од согласноста на жртвата.
„Станува збор за систем што овозможува истовремено следење на двете страни и поголема безбедност во реално време, но без наметнување дополнителни обврски врз жртвите“, појаснува Венизелос, додавајќи дека целта е и надминување на кантонските граници за да се обезбеди континуирана заштита низ целата земја.
Пилот-проектот во Во ќе започне со ограничен број, меѓу шест и дванаесет електронски нараквици, со кои ќе се тестира ефективноста на системот и оперативните процедури. Врз основа на резултатите, се очекува моделот да биде усовршен и потенцијално воведен на национално ниво во 2027 година.
Венизелос истакнува дека за успешна примена ќе биде потребна дополнителна обука за полицијата, како и усогласени протоколи за брза и ефикасна реакција при прекршувања.
Според официјалните проценки, семејното насилство во Швајцарија создава директни трошоци од околу 300 милиони швајцарски франци годишно, додека само во кантонот Во, полицијата интервенира од три до пет пати дневно во вакви случаи, што ја нагласува итноста од поиновативни решенија.
