Висока делегација од Пентагон, предводена од секретарот на американската војска Ден Дрискол, пристигна во Киев за да разговара со украинското раководство за можните чекори кон завршување на војната со Русија. Дрискол, заедно со шефот на Генералштабот Ренди Џорџ и врховниот американски командант во Европа Крис Донахју, треба да се сретне со претседателот Володимир Зеленски веднаш по неговото враќање од Турција.
Посетата доаѓа во момент кога се појавија извештаи дека САД и Русија работат на нов мировен план. Иако официјално не е потврден, два извора за „Ројтерс“ тврдaт дека Вашингтон ѝ соопштил на Украина дека мора да ја прифати американската нацрт-рамка за завршување на војната. Според предлогот, Украина ќе треба да отстапи дел од територијата и да се согласи на ограничување на своите вооружени капацитети, вклучително и преполовување на армијата.
Изворите додаваат дека Киев не учествувал во подготовката на планот, но од него се очекува да ги прифати клучните точки. Белата куќа избегна коментар, додека државниот секретар Марко Рубио порача дека САД „ќе продолжат да развиваат можни идеи за завршување на конфликтот“.
Украински официјални лица откриваат дека Вашингтон веќе испратил „сигнали“ за неколку потенцијални предлози што ги разгледувал и во разговори со Москва.
Во меѓувреме, руските сили контролираат околу 19% од украинската територија и продолжуваат со офанзиви на исток и југ. Владимир Путин и понатаму инсистира на значајни територијални отстапки како услов за крај на војната.
Според информации објавени од „Аксиос“, планот предвидува Украина да ѝ го отстапи на Русија делот од источната територија што во моментов не го контролира, во замена за американски безбедносни гаранции за Украина и Европа против идни руски напади.
