Кралот на Норвешка, Харолд V, кој со години важи за највозрасен жив европски монарх, беше хоспитализиран во вторник навечер на шпанскиот остров Тенерифе поради инфекција и дехидрација, објави Кралската палата.
Според официјалното соопштение, кралот се наоѓа во стабилна состојба и добива соодветна медицинска нега. Харолд е на приватен одмор заедно со сопругата, кралицата Соња, кога му се влошила здравствената состојба.
Норвешкиот премиер, Јонас Гар Сторе, за време на својата посета на Украина, преку јавниот радиодифузен сервис НРК упати желби за брзо оздравување на кралот. За поддршка на локалните медицински служби, личниот лекар на Харолд ќе отпатува во Тенерифе.
Ова не е прв пат кралот да се соочи со сериозни здравствени предизвици додека е на патување. Во 2024 година, за време на одмор во Малезија, Харолд беше хоспитализиран поради инфекција и му беше поставен привремен пејсмејкер. По враќањето во Норвешка, уредот бил заменет со траен.
