Израелскиот премиер Бенјамин Нетанјаху, по средбата со американскиот претседател Доналд Трамп во Белата куќа, изјави дека Израел сака мир со Палестинците, но категорично ја отфрли можноста за создавање независна палестинска држава.
Нетанјаху оцени дека секоја идна палестинска држава би претставувала платформа за уништување на Израел и потенцираше дека неговата земја мора да ја задржи суверената моќ за да ја гарантира сопствената безбедност.
„Сакаме мир со нашите палестински соседи – со оние кои не сакаат да нè уништат. Ќе постигнеме договор во кој нашата безбедност и суверената контрола секогаш ќе останат во наши раце“, изјави израелскиот премиер.
Нетанјаху како доказ ја наведе ескалацијата од Појасот Газа, контролирана од Хамас, при што ја нарече „жива илустрација“ на тоа што, според него, би се случило доколку Палестинците добијат своја држава.
На новинарско прашање дали е можно решение во форма на две држави, претседателот Трамп одговори: „Не знам“, и одговорноста ја префрли на својот гостин.
„Сметам дека Палестинците треба да имаат целосна автономија за самоуправа, но не и овластувања со кои би ѝ се заканувале на Израел“, додаде Нетанјаху.
Според него, Израел нема да прифати никакво решение во кое би се откажал од целосната контрола врз безбедноста – што, како што подвлече, е „клучот за опстанокот на државата“.
