Литванското Министерство за одбрана соопшти дека вечерва руски воени авиони накратко влегле во воздушниот простор на Литванија, предизвикувајќи брза реакција од ловците на НАТО кои беа на редовна патрола.
„Нашите сили дејствуваа веднаш со поддршка на ловците на НАТО кои патролираа. Литванија е силна и подготвена. Секој сантиметар од нашата земја е заштитен“, објави министерството на платформата „Икс“. Не беа објавени детали за типот на руските авиони, траењето на инцидентот или точната локација.
Литванскиот претседател Гитанас Науседа го осуди прекршувањето на суверенитетот: „Остро го осудувам нарушувањето на литванскиот воздушен простор од страна на ловци и транспортни авиони на Руската Федерација од Калининград. Ова е грубо кршење на меѓународното право и територијалниот суверенитет на Литванија, на кое мора да одговориме.“
Инцидентот следува по сличен случај во септември, кога три руски борбени авиони МиГ-31 влегоа во естонскиот воздушен простор кај островот Ваиндло и останаа околу 12 минути. Тогаш италијански борбени авиони Ф-35, дел од мисијата на НАТО за надзор на балтичкиот воздушен простор, реагираа на нарушувањето, додека Москва негираше прекршување.
Иако ваквите нарушувања се ретки, тие предизвикуваат сериозна загриженост по почетокот на руската инвазија на Украина во 2022 година. Сојузничките борбени авиони редовно ги пресретнуваат руските летови кои патуваат без планови, транспондери или радио комуникации, иако повеќето остануваат надвор од воздушниот простор на НАТО.
Балтичката мисија на НАТО за воздушна одбрана се одвива од базите во Шјауљај, Литванија, и Амари, Естонија. Мисијата моментално ја командуваат шпанските воздухопловни сили, кои распоредија осум ловци „Еурофајтер Тајфун“ во Шјауљај, додека италијанските „Тајфуни“ обезбедуваат дополнителна поддршка од базата во Емари.
