Два беспилотни летала погодиле дел од американската амбасада во Ријад, предизвикувајќи пожар во дипломатскиот комплекс, но засега нема извештаи за повредени лица, соопшти саудиското Министерство за одбрана. Според локалните медиуми, штетата била минимална, иако сведоци известуваат за силна експлозија и густ црн чад што се подигнал над комплексот. Саудиските власти го опишаа пожарот како ограничен, а амбасадата била празна во моментот на нападот, што ја намалила потенцијалната опасност за човечки живот.
Американскиот претседател, Доналд Трамп, во изјава за „Њуз нешјон“ предупреди дека Вашингтон наскоро ќе објави одговор на нападот. Претходно, амбасадата издаде безбедносно предупредување за американските државјани во Ријад, Џеда и Дахран, советувајќи ги да останат во засолништа и да избегнуваат посети на дипломатскиот комплекс.
Иранската револуционерна гарда истовремено објави дека нападнала американска воена база во областа Шеик Иса во Бахреин со 20 дрона и три ракети. Според државната новинска агенција ИРНА, нападот го уништил главниот команден центар на базата, но без да се приложат докази. Иран ја претстави акцијата како одмазда за претходните американски и израелски удари врз иранска територија. Американскиот Стејт департмент, поради безбедносни причини, нареди евакуација на семејства од Бахреин и Јордан.
Во меѓувреме, односите меѓу Израел и Либан ескалираат. Либанските медиуми јавуваат дека израелската армија извршила најмалку два воздушни напади во јужниот дел на Бејрут, во регионот Дахије, познат како упориште на Хезболах. Цел на нападите биле радио станицата „Ал-Нур“ и телевизискиот канал „Ал-Манар“, кои се поврзани со организацијата. Снимките од нападите покажуваат блесок, детонации и чад што се подига над објектите.
