Францускиот претседател Емануел Макрон изјави во Вашингтон дека европските воени сили во иднина треба да се вклучат во мировните операции во Украина.
„Ѝ е потребна силна армија на Украина и мораме да ѝ помогнеме со сили на терен. Ќе бидат потребни мировни мисии кои сојузниците се подготвени да ги обезбедат“, истакна Макрон.
Ова не е првпат тој да ја изнесе оваа идеја, но досега таа не довела до конкретни чекори или распоредувања.
Макрон додаде дека Доналд Трамп би бил подготвен да воведе секундарни санкции и царини против Москва „доколку Русија одбие соработка“. Тој потсети дека Трамп веќе има воведено царини за Индија поради купување руска енергија.
Францускиот лидер нагласи дека не е убеден оти Русија е заинтересирана за мир, додавајќи дека европските лидери му порачале на Трамп дека постигнувањето мировен договор не може да се одложува со недели или месеци.
