Рускиот министер за надворешни работи, Сергеј Лавров, изјави дека плановите за поголемо присуство на НАТО во Арктикот се причина за загриженост, бидејќи овој регион треба да остане територија на мир.
„Не можеме да не бидеме загрижени поради плановите за интензивирање на активностите на Алијансата во Арктикот, за кој ние, како и повеќето разумни земји, сакаме да остане простор на мир и соработка“, рече Лавров на Минската меѓународна конференција за евроазиска безбедност.
Тој нагласи дека „ширењето на НАТО нема да запре ни за момент, и покрај сите ветувања, затоа што Алијансата се стреми да обезбеди присуство во Тихиот Океан и ги поткопува основите на безбедносната архитектура, со цел да ја контролира Кина и да ја изолира Русија“.
Според Лавров, Русија не може да прифати евроазискиот регион да стане „феуд на НАТО“.
Тој истакна дека Русија нема намера да нападне членки на НАТО или ЕУ и е подготвена овој став да го вклучи во идните безбедносни гаранции за делови од Еуроазија, но дека лидерите на ЕУ избегнуваат да ги разгледуваат овие гаранции на вистински колективен начин.
