Францускиот политиколог Лоран Винатје, кој минатата година беше осуден во Русија на тригодишна казна затвор под обвинение за шпионажа, денеска беше ослободен како дел од размена на затвореници со Франција. Веста ја потврди руската безбедносна служба ФСБ.
Во замена, рускиот кошаркар Данил Касаткин, кој се наоѓаше во притвор во Франција по барање на САД, исто така беше ослободен.
Винатје беше уапсен во Москва во јуни 2024 година. Руските власти го обвинија дека додека собирал информации за руските воени и воено-технички активности, не се регистрирал како „странски агент“, што според нив, ја загрозувало националната безбедност. Судот го осуди на три години затвор, а во август минатата година медиумите објавија дека тој официјално се соочува и со обвинение за шпионажа.
