Словачка се соочува со сериозен шок во снабдувањето со нафта. Премиерот Роберт Фицо предупреди дека транспортот преку нафтоводот ЈАНАФ ќе биде драстично поскап за Словачка во споредба со класичниот маршрут преку нафтоводот „Дружба“. Според неговите проценки, трошоците би можеле да бидат повеќе од пет пати поголеми.
Фицо појасни дека зголемените трошоци за транспорт автоматски ќе го зголемат и финалниот трошок на нафтата за словачките потрошувачи. Тој истакна дека сегашната транзитна такса е нешто повеќе од 1 евро за тон нафта на 100 километри, додека во случајот со Хрватска таа би пораснала на повеќе од 5 евра.
На денешната владина седница во Братислава беше прогласена вонредна состојба поврзана со снабдувањето со нафта. Владата одлучи да ослободи 250.000 тони нафта од државните резерви за потребите на рафинеријата Словнафт.
Исто така, тој ја поврза моменталната состојба со геополитички фактори. Тој изрази сомнеж дека руската нафта не тече кон Словачка и Унгарија од политички причини, и додаде дека спорниот дел од нафтоводот „Дружба“ на украинска територија е поправен, што овозможува непречен проток кон Словачка.
Словачкиот премиер ја поврза ситуацијата и со изборите во Унгарија, истакнувајќи дека притисокот врз премиерот Виктор Орбан може да има политички мотиви, вклучувајќи го ставот на Будапешта за можна европска интеграција на Украина.
