Финскиот претседател Александер Стаб оцени дека Москва во тековните преговори за завршување на војната намерно поставува услови кои другата страна не може да ги прифати. Во интервју за „Фокс њуз“, тој ги нарече овие постапки „типични руски преговарачки тактики“.
„На почетокот се поставуваат нереални барања, а потоа почнува повлекување – тоа е нивен постојан модел“, рече Стаб, нагласувајќи дека руските територијални претензии мора правилно да се разберат од американската јавност. Според него, тоа би било како САД да се откажат од Флорида, Џорџија, Каролините, Вирџинија и Мериленд и да дозволат „коридор“ за напад врз Њујорк.
Тој потсети дека Русија се обидува да го заземе Донбас уште од 2014 година и сè уште нема целосен успех. „Путин денес контролира околу 75% од регионот, но за тоа му требаа 12 години, а половината ја доби на самиот почеток. Напредокот е бавен и ограничен“, додаде финскиот претседател.
Претходно, западните медиуми јавија дека украинскиот претседател Володимир Зеленски и европските лидери во разговорите во Белата куќа го споредија евентуалното отстапување на дел од Донецката област со сценарио каде Америка би се откажала од дел од Флорида.
