Пет европски земји соопштија дека рускиот опозициски лидер Алексеј Навални починал во затвор како последица на труење со редок и исклучително силен невротоксин, пронајден кај отровни жаби од Еквадор.
Според нивните наводи, станува збор за „варварски чин“ во кој бил употребен епибатидин – супстанца класифицирана како хемиско оружје, која, како што тврдат, може да ја користи само државен апарат. Европските претставници сметаат дека зад случајот стои режимот на рускиот претседател Владимир Путин.
Навални почина на 16 февруари 2024 година во казнена колонија во Сибир на 47-годишна возраст. Досега не е утврдено на кој начин му бил администриран токсинот. Според објавите на Sky News, епибатидинот е до 200 пати посилен од морфинот и природно се наоѓа кај одредени видови отровни жаби во Јужна Америка, каде што традиционално се користи за лов.
Резултатите од истрагата ги објави вдовицата на опозицискиот лидер, Јулија Навална, на прес-конференција одржана во рамки на Минхенска безбедносна конференција. Таа нагласи дека сега постојат научни докази кои потврдуваат дека нејзиниот сопруг бил отруен.
„Тоа беше најтешкиот ден во мојот живот. Денес знам дека ова не се само зборови, туку научно потврдена вистина“, изјави Навална.
Во истрагата учествувале Велика Британија, Германија, Шведска, Холандија и Франција, кои планираат наодите да ги достават до Организација за забрана на хемиско оружје. Британските научници од лабораторијата Портон Даун, според извештаите, имале клучна улога во идентификацијата на супстанцата.
Британската министерка за надворешни работи, Ивет Купер, изјави дека сојузниците работат „со неуморна решителност“ за да се открие вистината, додавајќи дека само руската држава имала „средства, мотив и можност“ за вакво дејствие.
Руските власти претходно негираа било каква вмешаност, наведувајќи дека Навални починал од „комбинирани болести“, меѓу кои и срцеви проблеми. Кремљ засега не ги коментираше најновите обвинувања.
