Во услови на ниски температури и енергетска криза, Европската комисија објави итна помош од вкупно 153 милиони евра за Украина и Молдавија. Со тоа се сака да се ублажат страдањата на милиони Украинци кои се соочуваат со ниски температури поради континуираните руски напади врз енергетската инфраструктура на земјата.
Од овие средства, 145 милиони евра се наменети за хуманитарни потреби во Украина – за заштита и засолниште, храна, парична поддршка, психосоцијална помош, како и пристап до чиста вода и здравствени услуги. Дополнителни 8 милиони евра се упатуваат кон Молдавија, која прифаќа голем број украински бегалци, за да им обезбеди сместување и основна поддршка.
„По повеќе од десет години конфликти и речиси четири години војна, украинскиот народ продолжува да трпи ужасни страдања. Цивилните жртви, уништувањето на инфраструктурата и масовните раселувања создаваат огромни хуманитарни потреби, кои сега се уште поизразени со континуираните напади врз енергетските системи“, стои во соопштението Европската комисија.
